أحمد عفيفي يكتب : قناة الـ « سي .. سي» .. توقف « البرنامج » .. اشكري يا نشراح !!

السبت 02 نوفمبر 2013 - 02:39 مساءً

أحمد عفيفي يكتب : قناة الـ « سي .. سي» .. توقف « البرنامج » .. اشكري يا نشراح !!

احمد عفيفى

 
طبعا من النهارده حيبقى اسمها قناة الـ " سي .. سي " من غير ا لـ " بي " اللي في النص .. والعنوان اللي اخترته للمقال باستثناء اشكري يا انشراح مش عنواني .. لكنه لزميل صحفي متميز اسمه احمد حسين كتبه على صفحته على الفيسبوك .. فاستأذنته في الاستعارة بعنوانه لمقال النهارده فسعد بذلك ولم يمانع.

حلو اوي اللي حصل امبارح ده .. الناس قاعدة مستنية باسم يوسف حيعمل ايه في الحلقة التانية بعد الاولانية اللي ولّعت مصر .. فراحت قناة الـ سي سي مطلعّة بيان اهبل زيها ان مفيش برنامج النهارده والسبب بقى مضحك وغبي وابن كلب .. مشاكل مع الجهة المعلنة .. وان باسم بعد الحريقة اللي عملها الجمعة اللي راحت طالب بزيادة آجره من مليون في الحلقة لـ 3 مليون في الحلقة برضه " عادي .. مش بيجيب اعلانات ب 10 مليون .. يبقى حلال عليه " .. وشوية هرتلة ملهاش لازمة .. المهم مفيش باسم النهارده .. واللي كان نفسه يضحك شوية من الهم اللي شايفه يروح يتغم وينام .
وخد عندك بقى .. " رويترز " تنقل خبر إلغاء برنامج باسم يوسف .. وشيكاغو تربيون الأمريكية في صدر صفحتها الأولى تشير الى ان إيقاف برنامج البرنامج يثير الشكوك حول حرية الرأى في مصر في هذه المرحلة الانتقالية الصعبة والمهببة .. وال سي ان ان كتبت هى كمان .. اتاري اللئيم باسم مكنش بيضحكنا احنا بس .. ده بيضحك الناس كلها في اوربا وامريكا .. وبجرة قلم حبره وسخ قام عم محمد الامين صاحب القناة  لاغي البرنامج .. ومرتضى منصور " الشرشوح " اللي مفيش منه اتنين في قلة الأدب والأباحة يعمل مداخلة امبارح ع الفراعين – حسب الموجز ما نشرت – ويقولك ان هو السبب في إيقاف البرنامج ، وانه قال للأمين .. الواد اللي عندك ده حيجيب لك الكلام وانت مش ناقص وجع دماغ .. واحنا طابخينه سوا ومش عايزين نفتّح الدفاتر وان كنتوا اخوات اتحاسبوا .. قام عم محمد الامين خاف على نفسه وملياراته حد يسأله جبتها منين .. راح قالك اضحى بباسم عشان انا اعيش.

وعلى نفس المنوال " الوسخ " بتاع مبارك ومرسي .. يخرج علينا سي احمد ابن الحاج المسلماني المتحدث الرسمي باسم الرئاسة ويقولنا .. او على رأى نوارة نجم " يمأمأ لنا " : إيقاف البرنامج شأن خاص لا علاقة لنا به .. وبالمرة العقيد احمد علي المتحدث الرسمي للقوات المسلحة وعلى الصفحة الرسمية على الفيس : لاعلاقة لنا من قريب او بعيد بإيقاف البرنامج .. ونحن مع حرية الرأى والتعبير الى ابعد مدى.

وتعالي بقى على صفحات الفيس والتويتر للصبح : اللي يشتم في باسم ويلعن اللي خلفوه واللي يشتم في السيسي واللي يشتم في القناة .. واللي تقولك انا كرهت السيسي من كتر خرفانه .. وعندها حق في خرفانه ، لكن معندهاش حق في حكاية كرهت السيسي ، لأن السيسي مالوش دعوة بالمجاذيب بتوعه .. لا قال لحد اعملوا شيكولاته باسمي .. " انا لا بسيح في البق ولا بتاكل لامؤاخذة "  .. ولا قال لعريس " مقطف " اشتري لعروستك شبكة عليها صورتي واسمي عشان تعلقها على صدرها ..

الراجل مالوش ذنب .. احنا اللي أغبياء .. احنا اللي غاويين نبقى دروايش .. ومعاتيه ولازم سلسلة طويلة تلف رقبتنا وواحد يجرنا منها واحنا فرحانين وقاعدين نلّعب ديلنا!

جايز جدا ومحتمل ان القوات المسلحة فعلا ملهاش دعوة بإيقاف البرنامج .. وجايز جدا ومحتمل حد " زغر بعينه " لمحمد الامين .. ومن غير ما يقول كلمة ، الرسالة وصلت .. وجايز زي ماقلت محدش من الحكومة اهتم اساسا باللي بيحصل ومش فارقة معاها برنامج باسم .. لكن الوطنية " نأحت " على عمنا الامين وقال في نفسه لأ كده عيب وكتير.

عارفين لو فيه ذرة ذكاء كان ايه اللي يحصل .. حاقولكم : رصدت القناة ردود الفعل الهائلة على جميع المستويات بعد حلقة باسم يوسف الأخيرة .. التي اثارت زوبعة لم تهدأ حتى الآن .. ومع احترامنا الكامل لحرية  الرأى  التعبير  .. الا ان الظروف الراهنة وحساسيتها المفرطة لا تتحمل اللوم او العتاب او السخرية من اى رمز وطني في مصرنا المحروسة .. خلوّنا نعدّى المرحلة السودا دي وبعدين ننتقد زي ما احنا عايزين .. يطلع سيسي يطلع حيسي .. محدش كبير على الانتقاد .. وبناء عليه قررنا تعليق برنامج باسم مؤقتا لحين استقرار الأوضاع ولو نسبيا مع كامل احترامنا للمذيع اللامع وكامل احترامنا ايضا لكل الرموز الوطنية في بلدنا.

والله العظيم انا مش بهزر .. عارفين لو قالوا كده كنت احترمتهم .. وكده كده البرنامج حيتوقف .. يبقى اعملها بشياكة وذكاء .. انما بنفس اسلوب العك الأزلي بتاع كل مرة .. يبقى معنديش ليكم غير كلمة باسم الشهيرة اللي انتوا كنتوا سعاداء بيها قبل كده : اشكري يا انشراح .. واشكري جامد أوي للسيد محمد الأمين!!
 

مصدر الموضوع: الدستور الأصلي








إستطلاع رأى

هل أنت راض عن أداء محافظ الإسماعيلية ؟

  • لا
  • نعم
Ajax Loader
مواقيت الصلاة
حالة الطقس
اسعار العملات